طلعة برية ( 1 ) وش رايكم بالبر عطونا اللي عندكم

[مخاوي الليل]

http://www.ala7ebah.com/upload/images/bismillah1.jpg

طلعة برية ( 1 ) وش رايكم بالبر عطونا اللي عندكم


السلام عليكم ورحمة الله وبركاته
الكثير منا يحب الرحلات البرية .. ويجد فيها المتعة والراحة بعيداً عن ضجيج المدن .. وتختلف مدة إلإقامة من شخص لآخر .. فمنهم من يفضل الإقامة لعدة أيام .. ومنهم من لا تتعدى رحلته الساعات !! .. وهناك آخرون تعتمد مدة إقامتهم على ظروف أخرى ..
http://www.w6w.net/album/35/w6w_w6w_20050426023818f4de3672.gif

البر يغني عـن همـوم المدينـه = الياازعجك نورالشوارع والاصوات
فيه ابتهاجات النفـوس الحزينـه = لاكثرت هموم الزمن والحسافـات
تستاق له كل الصدور السجينـه = بعيد عن صخب البلد والمتاهـات

الشاعر / سعد الجميلي


البر زين وطلعتـه تبهـج انظـار = وانا حياتي عشقها فـي نظرهـا
الروض لاصار به نفـلٍ وأزهـار = يالبا قـاعٍ امتلـت مـن زهرهـا
يوم السحاب يمرّ وتهل الامطـار = يسقي الرياض وترتوي من مطرها
ويرتاح راسٍ صجته كثر الاخبـار = من زود كذبه مايصّـدق خبرهـا


الشاعرة / مشاعر حالمة


شوق بدوي ٍ كل ماخاطره ضاق = أخـذ معاميلـه بساقـة نياقـه
ثم شب نار جمرها يحرق احراق = وسوّا عليها اللي ينشط مذاقـه
فنجال بن ٍ اشقر اللـون بـراق = يسوى الوجود ومادخل في نطاقه

الشاعر /الحربي


والارض خضراء تبهج القلب ويريح = والبر جاهـز للمكاشيـت وبـادي
كنـه ينـادي للمخاليـق ويصيـح = ياللي بوسط البيت وين انت غـادي
عز الله انـه يبعـد الهـم ويزيـح = شوفه منى روحي ويبري فوائـدي

الشاعر / السلوم


ياماحلا البران مع طلعة النـور = والشمس توه ترسل الود وتجود
عند الدلال اللي تنادي هل الشور = اهل الكفوف الوافيه ريحة العود
ودارت سواليف تقل در منثـور = والقاف حرك كامن الوجد بركود

الشاعر ؟؟؟؟؟؟؟؟؟؟؟


طلعة أسبوع تعـادل فعينـي سنيـن = ارمي بها أعبـاء الحيـاه و نكدهـا
أرجع لذاتي و أكسر أصفاد ( روتين ) = و أطلق عنان العين و أغسل رمدهـا
البر جنه .... و تكتمل مـع قريبيـن = نعمة و جنه ... و تحتضن من قصدها



http://www.w6w.net/album/35/w6w_w6w_20050426023818f4de3672.gif

فيه كم سؤال من مخاوي الليل للجميع ؟؟؟؟؟؟؟؟؟؟؟؟
س1 : هل تحب طلعات البر ؟
س2: كم مدة إقامتك في البر ؟
س3: ماهو عدد الاشخاص بنظرك الافضل ؟؟؟؟؟
س4: هل تفضل أكثر طلعه مع العوائل او مع الشباب والماذا ؟؟؟؟؟؟؟
س5 : موقف طريف او محرج حصل لك في البر ؟؟؟؟؟؟
ننتظر التفاعل من الجميع ادام وحواء ....................

http://www.w6w.net/album/35/w6w_w6w_20050426023818f4de3672.gif
تقبلو تحيات مخاوي الليل
http://www.w6w.net/album/35/w6w_w6w_20050426023818f4de3672.gif

[أبو رائد]

اولاً تسلم اخوي مخاوي الليل على مواضيعك الاكثر من رائعة وعلى هذا الموضوع الجميل ولابيات المعبرة .
اما من نحاية اسئلتك .
س1 : هل تحب طلعات البر ؟
والله اني اموت في البر لكن وين الفراغ
س2: كم مدة إقامتك في البر ؟
اقل من ثلاثة ايام لا تنفع
س3: ماهو عدد الاشخاص بنظرك الافضل ؟؟؟؟؟
ثمانية اشخاص في سيارتين احسن رقم واريح لطلعات البر
س4: هل تفضل أكثر طلعه مع العوائل او مع الشباب والماذا ؟؟؟؟؟؟؟
اكيد الشباب العوائل اكثر من يوم صعب يبي لهم عدة وعتاد والصغار لايتحملون البرد والصحراء ومخاطرها .
س5 : موقف طريف او محرج حصل لك في البر ؟؟؟؟؟؟
فيه مرة من المرات كنا في طلعة برية وبعد العشاء رحنا نصيد جرابيع وبعد ما نزل واحد من الشباب يطرد جربوع هربنا عنه وبعد ما رجعنا ندوره خفى نفسه المهم اخذنا نلف وندور بعدين صرنا نبعد عنه وبعد ما بعدنا عنه طلع ولكن اخذنا في الابتعاد وبصراحة من كثر الدوران دخنا وهو ورط يشوفنا صرنا نبتعد عنه ويصارخ ولكن لا نسمع المهم بعد جهد جهيد واكثر من ساعتين حصلناه ولا عاد نهرب عن احد من ربعنا بعد ذلك الموقف .
تحياتي ...

[القناص20]

الله يعطيك العافيه انت ومواضيعك الي جت بوقتها,
ج1: والله اموت بالبر لو مابه ربيع فكيف هذه الايام الله يدوم الخير علينا ولطلعات البر فوائد عديده منها التامل والتفكر في مخلوقات الله ومنها الطبيعه وانا كثيراً ما اتذكر سورة الغاشيه وخصوصاً الايه ((أفلا ينظرون الى الابل كيف خلقت والى السماء كيف رفعت والى الجبال كيف نصبت والى الارض كيف سطحت))والله آيه عجيبه تدعوا الى التفكر في آيات الله والحمد لله ان التفكر في آياته عباده,,
ج2: ثلاثة ايام لاتزيد ولاتنقص.
ج3: من سته الى عشره وعلى سيارتين كل سياره في كنود واخوياي من ضمنهم انت والتاج.
ج4: اكيد عزاب والعوايل حدهم يوم والى المغرب بعد,
ج5: والله المواقف كثيره بس ماودي التاج يسمعها الا اذا تعاهدني ماتعلم التاج تدري مااقدر والله اعذرني.
تدري عاد ذكر علي موقف قديم واول طلعه بحياتي وكانت عام 1406هـ قلت للشباب شوفوا والله يالكم تيس عندي بعد مانرجع ان شاء الله بالحصيه قالوا زين بس متى قلت عام 1410هـ قالوا ويييييين بعيد قلت قريب ووافقوا على مضض متباطينه بعد اربع سنين؟؟؟ وجت 1410 زي البرق وجت 1420 زيها وجت 1428 وهم ماشافوا تيسهم والسبب اني شارط عليهم يكونون متواجدين كلهم لان بعضهم توظف وراح تبوك وبعضهم بالرياض والباقين بالقرين والحمد لله والله مااجتمعوا الى مره وحده وكان بعزاء من فضل الله علي.

[صافي نوايا]

ياللي نويتو طلعة البر تمشون= خذوا وصاتي ماعليكم كلايف
لاصار بالطلعه صغار يروحون= خلك عليهم دايم الوقت خايف
أكبر خطرهي شبة النار تدرون=خلك عليهم يأبن الاجواد رايف
خذوا الحذر ياناس بالحيل تكفون=عند الحدث ماينفعن الحسايف

س1 : هل تحب طلعات البر ؟
بكل تأكيد
س2: كم مدة إقامتك في البر ؟
لاتتعدى ثلاثة أيام
س3: ماهو عدد الاشخاص بنظرك الافضل ؟؟؟؟؟
أقل من عشره
س4: هل تفضل أكثر طلعه مع العوائل او مع الشباب والماذا ؟؟؟؟؟؟؟
انا افضلها مع الشباب العوائل لايتحملون تعب الطلعات الطويله
س5 : موقف طريف او محرج حصل لك في البر ؟؟؟؟؟؟
في أحد الطلعات كنا في سيارتين وفي منطقه بعيده لايوصل فيها الجوال وفقدنا بعضنا في هذه المنطقه الكبيره ولا يوجد اي وسيلة اتصال
احدى السيارات يوجد فيها الخيمه واثنين من الشباب والسياره الاخرى كنت انا فيها واثنين اخرين والعزبه كانت معنا
وأكملنا الطلعه ولم نرى بعضنا الا في القرين

[مخاوي الليل]

التاج مشكور على التفاعل والمشاركه
الحقيقه أنا معك العدد ثمانيه مناسب جداً
وفعلا طلعة العوئل يوم واحد أفضل
الحقيقه موقفكم مضحك والحمدلله مهو وقت برد ولا كان اعلوم.

الضيف ياهلا بالضيف
مشكور على المشاركه بهذا الموضوع
في البدايه قلت نقطه مهمه جداً وهي التفكر والتعبر في مخلوقات الله اضغط هنا (http://www.al-qreen.net/vb/showthread.php?t=6281) وهي تعتبر عباده.
الضيف موقف جداً حلو لكن أقول جهز تيسك الاسبوع الجاي الشباب ازهلهم عليه بس حدد الموقع وانا والتاج وصافي نوايا اول الحضور ان شاء الله

صافي نوايا صح الله لسانك على القصيده
ومشكور على هالمشاركه في هالموضوع اللي اكتمل بحضورك وحضور الباقين
الحقيقه موقفك ضحكت منه وحقيقه موقف لاتحسدون عليه والمحظوظ هو اللي صارت معه العزبه.
وهذا يجعلنا نقف ونشكر الله على نعمة هالجوال اللي بذن الله لايمكن تضيع .

الشكر كل من شارك في هالموضوع وننتظر باقي الخير