طرق طبخ الجربوع

[أبو رائد]

الطريقة الأولى:
الشوي بالملة .
مباشرة النار من بعيد على اللهب ثم تدعك الجربوع حتى يطير الوبر اللي علية ثم تدفنه بالمله لمدة 20 دقيقة من غير استخراج اللي في بطنه وهي المفضلة لدي
الطريقة الثانية :
تقريباً نفس الأولى لكن بدون الدفن في الملة بل التقليب على الشبك او في السيخ هذه الطريقة متعبة شوي لكن تتميز بالنظافة من التراب .
الطريقة الثالثة :
القصديرة وهي ان تضع عدد من الجريبعات بعد سلخها في القصديرة مع البهارات الملح والطماطم ثم دفها بالجمر حوالي عشرين دقيقة وشوف طعم المرقه .
الطريقة الرابعة :
بالقدر الكاتم :
بعد سلخ الجريبعات ضع الكشنة والبهارات والملح بالكاتم ثم على النار لكن لا يتجاوز الوقت عشر دقائق وإذا زاد الوقت يمكن تفتح القدر وتلقاه مرقة فقط .
( طريقة سلخ الجربوع كمل القطع من أعلى الرقبة ثم امسك الجربوع من جهة الذيل واسحب الجلد للخلف ينزل الجلد مباشرة وبسهولة )
لا تأكل الجرابيع إلى في وقت الربيع وفي الديار المربعة وانتبه من صيدها وقت التفريخ
انتبهوا لا يعرف والي الحصية في هذه المعلومات وانقضوا على جرابيع الحصية وهو نايم

[نيو لوفر]

والله ماقصرت التاج على هذه المعلومات
وانت كذا حمّستنا على ممارسة الجربعه
هذي طرق الطبخ بس باقي طرق الصيد نرجو منك توظيحها لان اكثر الشباب يجون يبغون يطبخون الجرابيع بس مايلقون شي يطبخونه الي طاير راسه والي العظام مطحونه والي خلقه صاير جاهز للكباب ولايفوتك بعد الاصابات التي يتعرضون لها من مخوش وشبوك وبراميل وقشع الله لايعمينا
وشكراً مره ثانيه

[الفايز]

تسلم يالتاج على الموضوع ... تصدق كنت ناوي ارجع الجربوع المختطف حق الوالي له بس عقب هالموضوع شكل عشنا الليلة جريبيع اشوفه يناقز قدامي ...

بعد سلخ الجريبعات ضع الكشنة والبهارات والملح بالكاتم ثم على النار لكن لا يتجاوز الوقت عشر دقائق وإذا زاد الوقت يمكن تفتح القدر وتلقاه مرقة فقط:eek: كيف ؟؟؟
بسم الله منهم ومن طايرهم

[Abo Fawaz]

مشكوررررررر يا التاج على هالمعلومه القيمه .....



يا أعضاء المنتدى الليله ناويها جربعه....



الوعد الحصيه :)

[أبو رائد]

ابشر اخوي نيو لوفر
طرق الصيد .
الطريقة الأولى :
بالشبكة وهذه الشبكة توجد في محلات الرحلات ولها عصا طويلة وكي تجمع أكثر عدد من الجرابيع أهم شي الهدوء وينزل شخص واحد ثم يمشي بهدوء ويأتي من خلف الجربوع ليس بينه وبين النور ويكبس على الجربوع .
الطريقة الثانية .
وهي ان تأتي الجربوع ثم تجعله يمين السائق عادة عندما يدخل الجربوع في الظل يتوقف افتح الباب وعلى الكشاف اليدوي بهدوء اقبض عليه سواء بخرقة او باليد مباشرة .
الطريقة الثالثة .
هي الوقف على الصدام الخلفي وإذا وقف الجربوع أمام السيارة يمرر السائق بهدوء السيارة عليه بين الكفرات إذا دخل الجربوع في الظلام تحت السيارة لا يتحرك يكون الذي على صدام السيارة جاهز ومعه شخص أخر معه كشاف او كبس سوف تجد الجربوع يتحرك ببط أول ماتشوفه احذف عليه المنشفة او الخرقة اللي معك والق القبض عليه .
الطريقة الأخيرة :
وهي اقل الطرق صيدا للجرابيع وهي الطردي وهذه الطريقة أكثر شي فيها المتعة والضحك وهي خطيرة شوي ولا يصاد فيها عدد كبير من الجرابيع .
لسلامتك تذكر انك خارج للبر للمتعة انتبه من التهور في قيادة السيارة وان لا ترجع بمصيبة في سقوط او دهس احد زملائك فترجع من المتعة بمصيبة فيجب على السائق آن يأخذ حذرة عند المطاردة أن يهتم بسلامة زملائه
عدم النزول من السيارة او الركوب وهي تسير فكم من الشباب سقطوا على حجر خلال النزول .

الفايز تسلم على مرورك .
يتجاوز الوقت عشر دقائق وإذا زاد الوقت يمكن تفتح القدر وتلقاه مرقة فقط كيف ؟؟؟
اخوي اذا زاد الوقت على الجرابيع في القدر الكاتم الجرابيع تذوب تصير شوربة يعني ما تلقى الى عضيمات صغيرة ومرقة . لحم ماكو بااااح يتبخر مسكين الجربيع ما يتحمل .....
هلالي قريناوي
انتبه من والي الحصية ونتمنى لكم صيدا وفيراً واهم شي سلامتكم
معلومه تكثر الجرابيع في حدود الحصية الشمالية من جهة الحقاف ثم اتجه شوي غرب حتى المصك .
اما في الصمان يووووووووووووه ياجرابيع الصمان ما تشوف واحد تشوف على ثلاثة واربعة

[البدر]

مشكور يالتاج والله انك ماقصرت بالمعلومات الطيبة .
طيب أبغى أسئلك سؤال
الحين الجربوع يوكل ولا مايوكل :)

[((غيور على ديرتي))]

بارك الله فيك ياالتاج على هذا الموضوع الرائع
والصراحه شوقتنا للصيد الجرابيع الله يجيب الامطار وتربع الارض
وبمناسبه فيه مقوله قالها الجربوع وش رايكم فيها صادق ولا كاذب
انا الجربوع ابن مربوع اشبع عشره مع عشره
وكريعاتي حمل عيره والباقي وخريه يامره

[وآلي الحصيّه]

زين والله سكان ولآيتي صاروا اكلاتكم المفضله والله لاوريكم هين..$$211$$
التاج : قاعد تحرضهم وتشهيهم بعد ومره توضح طرق الطبخ ومره تبين طرق الصيد شف عاد اياني واياك الي بالولآيه اما الي بالحقاف بكيف انت واياهم.:mad:
ونيولفر : متحمس شكل التاج نزل موضوعه قبل الغدا واللفر جوعان نصيحه يانيولفر تراك ماتعرف التاج زين والله يوهقك ويخليك.$$201$$
الفايز : كفشناك ياسارق عشانا اثره انت الي مختطف جربوعي اشهدوا عليه والله ماينفعوك حقين الاداره ولاغيرهم يافيّوز.:confused:
هلالي قريناوي : بعد وتعزم على الحصيه طيب الوعد الحصيه؟$$211$$
البدر : يوكل او ما يوكل هذي ترجعنا 10 سنوات وراء الله يذكر ذيك الايام بالخير . مافمت شئ طيب اسأل الفايز...........
غيور على ديرتك : الجربوع تراه صادق ومعناها:
انا الجربوع بن مربوع = هذا من اسماؤهم عندنا الولآيه.
اشبع 10 مع 10 = يكفي عشاء لعشرين شخص اذا عزمتهم وهم صايمين...
وكريعاتي حمل عيره= لا ماهو قصده يحملن حمير لا قصده يستخدمهن كاعيره ناريه للصايدين امثال التاج وهلالي قريناوي.
والباقي وخريه يامره= يعني الباقي من الاكل الزايد عن الضيوف حطيه يامره يعني الشغاله حطيه بالثلاجه وبكره نحميه وناكله.

[كاسح الصعاب]

مشكور يالتاج على المعلومات

نيو لوفر على طاري الجربعه وش يذكرك فيه المقطع هذا
http://www.4img.com/ar/up/06/11/06/62da8c91ce7b10846231921795d6059e.3gp

للحفظ (http://www.4img.com/ar/up/06/11/06/62da8c91ce7b10846231921795d6059e.3gp)
ياويلكم$$211$$ كشفكم الوالي

[ابو تركي]

الله يذكر ايام الربيع والشمال بالخير ...
الجرابيع ماهن بالحصيه ولا بالحقاف الجرابيع بالصمان والله وتراء ماهو خوف يالوآلي بس الحق يقال.

[نيو لوفر]

عزيزي الوالي
ان شعب ولايتك يتمتعون بشعبيه كبيره حتى صار يؤخذ لهم حساب ولكن ماهوسر تمردهم في الاونه الاخيره في الامس القريب واحد منهم هرب من الولايه وبهربه صار هو حديث الشارع وهذا في الواقع يؤثر سلباً على سمعة الوالي والولايه ويشكك في وضع الديمقراطيه فيها وهذا ماجعل الاخرين تسول لهم انفسهم بالاعتداء نرجو منكم وضع اصلاحات جديده لتلافي خطورة الموقف والنظر في قانون الاعدام وتعديله ولا اخفيكم سراً انه نما الى علمي ان هناك مؤامره تحاق ضدكم لإسقاط نظامكم بمساعدة ولايات مجاوره لها مصلحة في ذلك نرجو اخذ الحيطة والحذر واحذر ان تكون في يوم من الايام ( نظام الوالي البائد) ثم عاد الجرابيع ماترحم والله ينتفونك .

[نيو لوفر]

اخي كاسح الصعاب العزيز
الله ذكرتنا بالذكريات الجميله والله يجيب المطر والخير فيه الوناسه وراحة البال
لايفهمونا الشباب غلط الموضوع مطاردة جربوع خارج ولاية الحصيه وبالتحديد ولاية فيضة المرسام
واسأل البرق السعودي عن رحلة 10 كيلو
وشكراً لك على هذا الابداع ............