قصيدة الشاعر نايف سعود ورد الشاعر حسين عبيد الله عليها

[حسين بن هندي]

هذه القصيدة للشاعر / نايف بن سعود السليمي يسندها على الشاعر / حسين بن عبيد الله


ياهل الركاب اللي ركبتوهن إعصير= أوموا عليهن واسروا الليل كله
سروا اخطاهن مع إسهال وعثامير= والذيب دربه لاسرا ما يضله
حثو همايم مبعدات المشاوير= مهاوزات البعد وأيضاً الأظله
قطم الفخوذ امنجبات المناعير= شيب الغوارب مشبهات الاهله
وساع الفجوج وحوش برص المواخير= سمحات الأيدي مدركات الأدله
عربن نسبهن ما نسبهن مثيبير= ما نس منسبهن نسب كل خله
ما حافهن بالسوق عبد الدنانير= اللي يبيع أبوه لو هو حصله
حامي جنبهن محتميهن عن الغير= ما حد لد السوم دقه وجله
مرباعهن قفر الحيا والمخاضير= في خايعن راع الغنم ما وصله
يتلن طياح وسوم وبل الشخاتير= على هواهن لهتون قوطرله
واليا وصلتم للمحلاني على خير= وافلح نهار اللي لزومه وصله
بلغوا سلامي للرجال المشاهير= نطاحة الواجب لاوجب ما تزله
عزاز النفوس مدلهين المسايير= ربع على الطوله نمور مطله
عموا وخصوا حسين ريف المسافير= شبلٍ همام ومجلسه ما تمله
ما غال للنخوه كما صنوا خنزير= ما هان في عينه ضهيدٍ زبنله
راعي هلا ما هي تتطبع وتزوير= مالاذ وقال للبيض روحن قولن له
خوذوا علومه ثم هاتوا تقارير= قول الحقيقه حق ما هي مذله
وقولوا صحيبك يا وفي المشابير= اصبح عليل الحال ماحدٍ فطن له
من غي فر وطاح بأقصى زمهرير= قامت لواهيب اللظيه تمله
عقب عقب حد الوطا للشناظير= عدّا لهديب الشام وشد الرحله
هبت في الخافق هبوب ومعاصير= وذيب السعه ضيق السعه ما حتمله
بالضيق ما يسوى عشا العنز شعير= راع المثايل والمثل نمتثلّه
دون الوقار مبلمات المعاذير= خلقت على مله وماتت بمله
حنت على جسر الهلاك البوابير= ما بازرق الميت حياه وتدله
وسبع العجاف بكف غل التياسير= محروم معطى وعلة الغل عله
وكليب مات وثار في ثاره الزير= لو انهزم جساس سالم وصله
وريحانة الوجدان نفح المعابير= ذعذع بها الهاجس بعد ذعذعله

ورد الشاعر / حسين بن عبيد الله على الشاعر/ نايف بن سعود بهذه القصيدة


حي الركاب اللي لفنا معايير= ترحيبة اللي شـايفٍ غالي لّه
بالركب واللي فوقهن من مناعير= اعداد سحب بالسماء مستهلّه
يا مرحبا أحلى من حليب المصاغير= اللي رعن حوذانةٍ مستطلّه
ياراكب اللي لا مشا كنه ايطير= يطوي سهال واسعه مسمهلّه
حر سبوق يفوق وقت المغاوير= ياصل ويوصل بالرها راكب لّه
جروان جده من حرار مشاهير = وخضرا الذلول السابقه جدتلّه
وعليه من بلهان حليا وتصوير= وأيضا مثل سمحان في فزّ تلّه
ذكرني اعريجان وبه ميزة غير = ومطيع للي راكبه خاضع لّه
عليان ابوه ومنحني كالسنانير= تقول قوس وراكبـه مستولّه
عامين غير امه رضاعه على ضير= ثنتين يرضعهن وهن يعطفن لّه
ويرعى طيابة عشب قفر ونواوير= معشّب حتى ان عمره كملّه
بالجلس الاول عاسفينه بتسْخير= حتى تهندب والرسن مايتلّه
والكور مضبوطٍ بقد ومسامير= وبدود طرف وكنهن فرش زلّه
والخرج فوقه والسفا يف محادير= عند اربعه مع فزته يلعبن لّه
وقدم الغزال الميركه مبرم السير= ومبطنن واخصار من شان دلّه
ذا مركب الجدان ماهو حناتير= سفن الصحاري والدروب المزلّه
من عندنا ممشاه مع وزة الطير= وضحي ياصل للقرين وهللّه
عليه مندوبي وقافي وتقدير= لبو مشاري ياصله في محلّه
مرحب بالضيف من دون تأخير= طيبه طبيعه والوفاء عادتلّه
لاديرفنجال الدلال المباهير= عط نايف بن سعود ظرف السجلّه
وتبا الحقيقه والعلوم المصادير= للِّي نصاني ما ملكته فدلّه
لو كان يلحقني بفعلي مخاسير = أمشي معه واسير طوع ارضلّه
وصبر وقناعه بالفتى بعد تفكير= ولو الجبل ينزال تبقى الجبلّه
ومسّاحة الاسفنج تمحى الطباشير= والنقش بالا حجار ما زال للّـه
ولو أزرق الميت وصلّك صنافير= مده وجزره يا فتى راجعن لّه
وبالبحر الأحمر للجواهر مدا وير= ومن غاص جاب الدر في موسم لّه
ودرب به العاثور غيره معابير= تلقى طريق ما يجي به إشكلّه
واللي جنى بكليب قص الحناجير= وكثر حيل جساس ما يشفعن لّه
ولا ظن بالدنيا ولا شيء ما يصير= وكلش بتدبير الولي رادة لّه
وعساي نلت ارضاك في كل تعبير= والعبد يخطي والولي عاصم لّه
وصلوا على اللي بدّل الشرك تنوير= محمد اللي نتبع منهج الّـه