ديوان حسين بن عبيد الله ( مساجلة بين حسين عبيد الله والشاعر غزاي محمد السليمي)

[حسين بن هندي]

قصيدة أسندها الشاعر / غزاي بن محمد السليمي على الشاعر / حسين بن عبيد الله



يا حسين يا مشكاي تاه الفكر تاه= ووجست من شكواي مر القطيعه
حاولت اصبر واتركه واتلاشاه= صبر على ما قيل سد الذريعه
والصبر مر اليا وصل حد منهاه= واليا تعدى الحد الصبر ضيعه
واخطأ عليه ووصل العلم منهاه= ولا ارضى الخطأ ولا تمشي علي الهزيعه
من عنجهين ما حسب غيب عوجاه= حاقد عليه وانكشف لي ضريعه
مغرور بنفسه ونعمى والله اعماه= لينه وقع وسط الحصون المنيعه
هو مادرى اني عارف ادناه واقصاه= واعرف عقايد ناس سنه وشيعه
وان كان صمم واستمر بخطاياه= قلنا على راس المقوقي صنيعه
ننشر افعوله لين نبين خفاياه= وتبين لكل الناس على الطبيعه
واعد ما واجهت واللي سمعناه= وعندي على ماقول شهود الشريعه
علم صحيح ثابت ماخترعناه= ماهي علوم أهل القلوب الوجيعه
والله لحده لين نكشف مغطاه= واخلي كل الناس فعله تذيعه
والكبر غره وابعده عن دناياه= والله رما به ما حسب بالوقيعه
يبا يتلاشى غلطته مير ممداه = ضاقت عليه إفجوج نجد الوسيعه
هاذي وصوف النذل وهاذي مزاياه= مني يجيه اردود فعله سريعه
يا حسين جار الوقت وازريت لقواه= وصبر المهونه عيب ما نستطيعه
عطني رايك يا ابيض الوجه عطناه= أنا اردعه ولا اتشيم وابيعه
يا حسين لمثله ما تفيد المداراه= خايف يتمادى في خطاه ويشيعه
واليا اعترض متيح لي اتحداه= ونفتل قيود أهل القلوب اللكيعه
ما حسب حسابه كان لي زان مرماه= ولا اخلي المذكور يذب ريعه
والكبر غره ونكسه لين خلاه = اصغر من الذره بجذع النقيعه
ومن قرد حظه يوم بنحورنا تاه= ورمى بنفسه للسباع المجيعه
اشعب لبس ثوب الطمع لين عداه= فيه الحسد والبخل ماهي بديعه
واسئل ضيفه يوم ضافه وعشاه= حكموا عليه أهل النفوس الدنيعه
لولا الكفيل اللي فزع له ونجاه= كان احجزه بالبيت ماله شفيعه
جير عليه وحيره لين وفاه= وفعل الردا عند الملكع ربيعه
وعلى مسار الذل تمشي مطاياه= ونثبت فعل أهل الفعول الشنيعه
ويا بن هندي حكمك اليوم نرضاه= وباللي علي تشير والله لطيعه
أنا انطح اللي بالردى حد شلفاه= والا اسفهه وعاتبه بالقطيعه
وتم الكلام وجوهر العلم نبغاه= وننشر لك البيضاء براس الرفيعه
وصلاة ربي عد وبلٍ نثر ماه=على نبي للخلايق شفيعه


ورد الشاعر/ حسين بن عبيد الله على الشاعر / غزاي بن محمد بهذه القصيدة



بسم الذي يدعونه الخلق باسماه= المعتلي من فوق خلقه جميعه
اللي له عباده يخرون لرضاه= الروس والأذقان خرت خشيعه
الواحد اللي كل مسلم برجواه= علام ما تخف الصدور وسميعه
عني على قاف تأملت فحواه= جذاب لشجون القريحه لميعه
غزاي به نادا وفزيت لنْداه= قلت الخبر ويقول شكوى فضيعه
عانا وعنّالي معـانـات شكواه= وعانيت ما عانا ربيب الطليعه
يشوف ما يكره ويجزع من ارضاه= والمشكلـه غوال سبهي شفيعـه
لخْطا القدا جاهل راع العرف مخطاه= يحسب حساب اليوم واللي تبيعه
ومن لاحسب احساب غيره وراعاه= زل القدم به ونحرف عن سنيعه
ثلاث سِلم سنّة السَّلم وحماه= قدام بت القول وفصل النخيعه
يسلم بها الرجال لا مد يمناه= من شرهت الشرهان وسو الفديعه
وحسوفة الطيب على زلة أخطاه= وزلت لسانه بالإذاعه تذيعه
للذبذبه تأثير والإذن مصغاه= لذاعة المذياع والمستذيـعـه
وانته بخيص بمبتدأ القيل واتلاه= أسويت واستفتيت براع الوديعه
ويكفيك ما سويت وانساق معناه= فيه الإجابه والعلوم البريعه
واللي يابو سعود رجيت فتواه= امنين ماوجه لقاها منيعه
السيل جارح ونحدر يم مشحاه= وتدلجت شعبانها مع تليعه
خلى الشجر وقيف والعود بلحاه= وإلا زهوره بعد سيله صريعه
ساق الحقاق وضاق بالسيل مجراه= حت الورق وبله وخلى جذيعه
الغيب خافي والخفى ما علمناه= والوقت يمضي والليالي امريعه
هرج السعه لنوخ الضيق يجلاه= والحق لا حصحص تلألأ نصيعه
الحق ما يبغى محاكم ولا قضاه= معروف ما هو دبك خيل بقيعه
وقول الحقيقه حق والحق مخفاه= غير القلوب الموجلة والصديعه
وان شفت مبلي ناقل داه برداه= خله واللي نم لك لاتطيعه
ومن طاوع النمام غثّه وعناه= وشرارة الفتنه تشب الوليعه
وبعض السوالف ياابيض الوجه ما ذاه= لها عن الطولات باع جبيعه
وكف اللغاوي بالملامه محناه= لغاوي المسمت اعلومه خليعه
مذموم ذِمه والمخاليق تشناه= عن الرفيعه ملتجي بالوضيعه
والصبر يا غزاي به خيرتلقاه= خصله حميده للرجال الشجيعه
شاورت بن هندي وهاذي وصاياه= إصبر وصبرك ربنا ما يضيعه
خذها على مثل ابيض الشاش مهداه= نصايح من قلب ما هي خديعه
وصلاة ربي عد حرف قريناه= على نبي من صفاته ضلِيعه