مشاهدة النسخة كاملة : ديوان حسين بن عبيدالله السليمي(الحكم والنصائح)
حسين بن هندي
08-24-2006, 09:57 PM
سر ياقلم واكتب على السطر لا تميل = وسجِّل على زين الورق من قصيدي
ابوصي اللي يفهم العلم لاقيل= العاقل اللي لا سمع يستفيدي
دينه مبدِّيها ودنياه ماتعيل =حافظ على الثنتين بحبلٍ جويدي
ومن بر في والديه يَجْنا المَحاصيل=مما زرع يلقاه وقت الحصيدي
والجار حقه واضحٍ كنّه اسهيل =أوصى به القرآن كل العبيدي
ونبيّنا بلّغ بما قال جبريل = رواه مسلم والبخاري شهيدي
والضيف عجِّل له في اقراه تعجيل = ورحّب بضيفك لا لفا من بعيدي
وقدّم له الترحيب مع دلة الهيل= مع ما تيسّر قدّمه عند الايدي
وحق الخوي معروف عند الرجاجيل= اللي لهم بالدور رأي سديدي
قصة انويشي والبلالي دواليل= وغيره من الأجواد ماهو وحيدي
واختر من الاصحاب قرمٍ وحلحيل= مفراص فولاذٍ يقص الحديدي
اللي كما بليهان يصبر على الشيل= ماهو جضور لو كان حِمله يزيدي
وجنِّب عن اللي صحبته تجلب الويل =نمام لَعْراض الخلايق يصيدي
هذار بالنمات شريط تسجيل تسجيل= يذكر مساوى ناس ويضا يزيدي
واليا طلبته شيء ما من محاصيل= صفر على الشمال ماهو رصيدي
صاحبك عنوانك بالامثال قد قيل= الطير ياقع مع شبيهه اكيدي
والصمت حِكْمَه لا تكثِّر من القيل= إلا كلام الحق وإلا المفيدي
حسين بن هندي
08-24-2006, 10:09 PM
من مفردات القيل نكتب مباحه= وعساه من معناه ما يصير عاري
يصير له بالقيل قدر ورجاحه= وعلاج للي جاري له جواري
التجربه برهان ثابت نجاحه= والخافي الغامض يجيله مواري
نومك على كوعك بلا هم راحه= ويعيِّـفَك لين المخدّه طواري
وبعدك عن اللي ما توده رباحه= والمكسب الطيب خوي مباري
واسند على اللي مخلصٍ في نصاحه= تنصاه بالشِّده لحَل العساري
وإلا الردي لو يعجبك باقتراحه= ماله على جزل المواقف محاري
مثل سراب الصيف يجذب ضحاحه= واليا وصلته ما لقيته خباري
كم قانصٍ بالطير يطلق سراحه= لاصار ما ينفع بصيد الحباري
والسر لفشيته ترى ذاك باحه= مروِّج النمَّه كثير الهذاري
ببضاعة النمام كم شخص لاحه= بدَّل مشارب صافيه بالْعَكَاري
وبعض الخطأ ما ينتعالج جراحه= كلمة ردا من صاحبٍ مَا يداري
واسعا لرزقك في وسيع المساحه= ترى التعب عقباه جَنْي الثماري
ترى ركود الماء يذهب صلاحه= الله فَرَقْ ما بين آسِنْ وجاري
والطير له راحه برفَّة جناحه= ومضمون رزق الكل من عند باري
والحظ له قومات والْه إنسداحه= وماقدَّره باريه جاله إجباري
عطشان لو يسقيك غيرك قراحه= من كف غيرك به ملاح ومراري
وفي ما تحوزه لايجي بك شفاحه= أشعب لبس ثوب المذله حساري
حسين بن هندي
08-24-2006, 10:16 PM
ياعيال أبهديكم نصيحة وترشيد=عسى بها تلقون بعض الافاده
مما طرالي يوم جني مواريد=نقيت مما جاز لي من اجداده
العلم نور ويرفع العبد ويفيد=وجَهْلَك ظلام ونزَّل الجهْل ساده
العلم نور وفيه للفكر تزويد=كلٍ تمنى له حصيله ابماده
ومن قام بالتعليم مشكور وازيد=للّي بذل للعلم كل اجتهاده
ومن جد من مبداه ينجح بتأكيد=ومن لا يبالي راح بليا استفاده
ومن لا جتهد خسران والعامه إيعيد=وغيره مجد ونسبته بالزياده
واوصي شباب اليوم عبر الأناشيد=في طاعة الله والتقى خير زاده
نربأ بكم تحذير بعض التقاليد=عن ما يعيب النفس خوذوا حياده
حذرا رفيق يلحَقَك منه تسويد=تلقى دروبه عوج ماهن قصاده
ترى جليس السوء ساس المناقيد=ومن صاحب الأنذال تايه رشاده
عن المخدِّر نبتعد يالأواليد=اللي يعرّض صاحبه للإباده
ذعف السموم يدمِّر الجسم ويبيد=وتجرّعَك للسم ما به سعاده
السم الأبيض من هَل الشر توريد=واللي يذوق السم فالسم جاده
مفتاحه التدخين تدريج برويد=واليا وصل للزيت ولَّع إزناده
ومن صار للإدمان ملكٍ وتهديد= ما تنفعه جرعات طب العياده
والوالدين اعطف عليهم ابتوديد=برك لهم ساعة كبرهم اعباده
إفرش لهم ردنك وقايه عن الحيد=رد الجميل إبما حصل بالمهاده
تكسب رضا اللي يفني الخلق ويعيد=ويبر فيك أبْنَاكْ وتجني حصاده
وحذرا عن اللي بالقفا له ملا كيد =تقول صدق إن جابها في ركاده
بين الأحبه شبها دون تقييد=بَدّل صفا ولف الأحبه نكاده
حب النمايم مهنته قاطِع السيد=مروج النمه ضعيف الاراده
وحب الوطن واجب ودحر النماريد=شنوا عليهم حرب مابه هواده
في ظل منهو وسَّع البيت تشْييد=فهد نهض للمجد رفعة ابلاده
وولي عهده نال بالرأي تأييد=أجمع على رأيه جماهير قاده
والنايب الثاني عن الصعب ما يْحِيد=في حال غيث وحال يخشى عناده
وصلوا على اللي بدل الشرك توحيد=اعداد ما خط القلم من مداده
حسين بن هندي
08-24-2006, 10:24 PM
أنا اتشرف في زيارة بعض ناس= إن زارنا وإلا نزوره على طول
وبعض العرب لو غيرهم مابه أوناس= لو لزَّموا يدعونني قلت مشغول
بعض التودد غير مبني على ساس= ومن لا يفرِّق بالعرب شخص معلول
والرجل يعرف له مع الناس مجلاس= وتجاربه تنبيه ما كان مجهول
والماكر العالي يجي فيه قرناس= ويبيّن الرجال وقفات وافعول
ويفرق لميع الجوهره وسط الالماس= ويميز القصدير من لمعة اللول
لاصار ما بالراس تمييز واحساس= الجسم ما ينفع به العرض والطول
بعد التروي تفهم الناس بقياس= وعرفك لهم ريَّحك مع ذولك وذول
إختر رفيقٍ طيبٍ يرفع الراس= طيبه طبيعه يشهد الفعل للقول
بعيد شوحه كان للحبل مساس= مفراص ماص وكنه السيف مسلول
ومعالي الأخلاق للرجل نبراس= واللي يرام العز ما الباب مقفول
والطيب وهبه واهبه مجر الا نفاس= ولا شفت له بالسوق بايع ولا زول
والمال عونٍ لك على قوة الباس= إياك والتبذير والكف مغلول
والرزق من عند الولي ربح وافلاس= ما جيب بالقوه ولا حيلة ازحول
ولا ظن بالهيِّن كسب شخص نوماس= درب العلا صعود ما ينزل انزول
قمّه مراقيها تملَّس تملاس= والحر جنحانه ترقِّيه لتلول
وكلٍ بعقله لابس الدرع والطاس= لو ما رضى بالمال والرزق مكفول
وبعض العرب ما همه إلا التبلاس= دايم على غرات الاجواد مجبول
ما شاف اعيوبٍ فيه ويطب ماقاس= ويشوف عيب الناس بعيونه الحُول
شمعة نهار ما تنور بالا دماس= سراب صيف ما لقي فيه محصول
تراه ما ينفعك منه اقطع الياس= كفه مع أهل المجد قاصر ومشلول
ومن قال أنا الكامل به الفكر منحاس= لو كان قوله صدق فالقول مملول
تم الكلام اللي كتبته بقرطاس= وعساه للقارئ مفيدٍ ومقبول
وصـلاة ربـي عـد ذرات الاطعــاس= علـى نبـي ســنته خـــير دالـول
حسين بن هندي
08-24-2006, 10:30 PM
شباب ياللي من معادن ثمينه=ابنا الرجال أهل التقى والشهامه
فيكم شبابٍ تفتخر والدينه=في سيرته وابوه مرفوع هامه
فيه الحياء بحدود يعجبك دينه =وعند المعلم والعرب له مقامه
يجلس بآداب ومشيته في سكينه=فطنٍ مهندب والشكاله إلجامه
يسمع كلام وينتقي من سمينه=واذا تكلم ماهذر في كلامه
وحَّد واطاع الرب مِجْر السفينه =وحريص بطاعة والده واحترامه
وتثمر جهود ابوه وتقر عينه=باولاده اللي طيبهم هو مرامه
وبعض الشباب اليوم بنفوس شينه=لادين ولا دنيا وفيهم رخامه
يقول فاهم ما يبا ناصحينه=بدّ ل نهاره ليل واليوم نامه
وله شلة ما ينفعونه تهينه=مريض والشلات زادوا إهيامه
تلقاه بالحاره يدوّر قرينه=اختار له قبُّوع وخلى العمامه
وبخاخ بويه حامله في يمينه=ويكتب على الجدران ذكرى غرامه
وعلى الرصيف إيقيف مواعد خدينه=بكره لبوه يجيب جوز الحمامه
الباب له مفتوح في مصرعينه=فلوسٍ وسياره ومع السلامه
وتسمع في الشارع فحيط المكينه=مع داخن التفحيط ثوّر عسامه
والأجنبي تلقاه يعرف رطينه=وبالدين مايعْرف حلال وحرامه
وخطرٍ للإدمان يبقى رهينه=وابوه ما تجديه عضَّة ابهامه
أهمل بعدل العُود في وقت لينه=فات الأوان ولايفيده قَوامه
وكلٍ يلاحظ وين موقف بنينه=وهو الحكم ويحط عنده علامه
وصلوا على اللي هجرته للمدينه=موضّح الدين الحنيف ونظامه
sayyed110
05-26-2008, 11:39 AM
تسلم على الدرر
حسين بن هندي
05-27-2008, 12:23 PM
sayyed110
تسلم على المرور العطر
نورت الديوان يا هلا
الشامخ
07-02-2008, 06:11 PM
الشاعر حسين بن عبيد الله
صح لسانك
نصائح ثمينه ومنهانستفيد من شاعر كبير
تقبل تسجيل اعجابي بشعرك الجزل
الشــــــــــــــــــامخ
حسين بن هندي
07-04-2008, 02:56 AM
حياك الله أخي الشامخ ورفع الله قدرك
مرورك عطر كصاحبه وأشكرك من الأعماق على ثنائك الجميل وما عليك زود أنت من الشعراء الذي نتطلع لإبداعهم وشموخهم.. وأنا سعيد بتوقيع الشامخ على صفحات ديواني
تحياتي
عبدالله بن حسين السليمي
08-30-2008, 04:34 PM
شكرأ على النصايح ياااابو عبد الله نصايح جزله ومفيده للي يبي الافاده الله يوفقك
اخوك عبدالله السليمي
حسين بن هندي
09-09-2008, 08:12 PM
شكرأ على النصايح ياااابو عبد الله نصايح جزله ومفيده للي يبي الافاده الله يوفقك
اخوك عبدالله السليمي
الأخ عبد الله
العفو بارك الله بك
شاكر ومقدر ثنائك الجميل ومرورك الرائع
نورت الديوان أنار الله لك الطريق إلى الجنة
دمت بخير ويا هلا
الأستاذ القديــر و الشاعر المبدع
مررت اليوم بين جنبات قصائدك
لأرسى بأحرفي هنـا
مسجلة بصمة حضوري
و اعجابي بهذا الكم من الحكم المنيرة
قيم ما دون هنـا
سلمت أناملك سيدي
مع التحية و التقدير
حنـان
حسين بن هندي
09-12-2008, 04:11 PM
الأستاذ القديــر و الشاعر المبدع
مررت اليوم بين جنبات قصائدك
لأرسى بأحرفي هنـا
مسجلة بصمة حضوري
و اعجابي بهذا الكم من الحكم المنيرة
قيم ما دون هنـا
سلمت أناملك سيدي
مع التحية و التقدير
حنـان
المشرفة العزيزة والمميزة والمتألقة دائما :
القديرة حنـــــــان
أهلاً وسهلاً بكِ
وتسلمي على تركك بصمة جميلة على ديواني
فوجود متابعين بروعتك يثنون على قصائدي
هو دافعي دائما إلى الأمام..
الله لا يحرمني من طلتكِ ودمتي في رعاية الرحمن
حسين
الاصيل
09-25-2008, 10:15 AM
شاعرنا المتميز
صح لسانك
بعد الابتهالات وتتويجك الحرف بالذهب
انتقلت لديوان الحكم لاجد الفائدة التي سجلت بالذهب
دامت سيادتك للحرف وترصيعه بالذهب
تقبل شكري الجزيل
لحرفك الرائع والجميل
الاصيل
حسين بن هندي
09-27-2008, 04:11 PM
شاعرنا المتميز
صح لسانك
بعد الابتهالات وتتويجك الحرف بالذهب
انتقلت لديوان الحكم لاجد الفائدة التي سجلت بالذهب
دامت سيادتك للحرف وترصيعه بالذهب
تقبل شكري الجزيل
لحرفك الرائع والجميل
الاصيل
استاذي الاصيل
صح الله بدنك ويسلم رأسك
أسعدني مرورك وأطرائك العذب والجميل لشخصي المتواضع
شكرا على اطلاعك على الديوان وكل ما يكتب به
لك أعطر التحايا
أخوك حسين
ابو طارق
11-12-2008, 10:08 PM
صح لسانك..
ولاهنـــت
قصائد رائعه جداً تحمل بطياتها الكثير من المعاني والمفردات الجميله..
قصائد تستحق الوقوف لها والتصفيق لها اعجاباً
تحياتي وتقديري...
اخوك:
التاريخ
حسين بن هندي
11-26-2008, 10:02 AM
صح لسانك..
ولاهنـــت
قصائد رائعه جداً تحمل بطياتها الكثير من المعاني والمفردات الجميله..
قصائد تستحق الوقوف لها والتصفيق لها اعجاباً
تحياتي وتقديري...
اخوك:
التاريخ
حفظك الله اخوي العزيز: التاريخ
بقدومك نورت ديوانى بنورك المرح والجميل
وشاكرلك ردك الطيب والعطر وثنائك الأكثر من رائع
تقبل أرق وأخلص التحايا
دمت بخير
حسين
ولـد شيـوخ
12-02-2008, 08:44 AM
صح لسآنكـ يابوعبدالله
حكم ودرر جوهريه
شكراً لكـ
حسين بن هندي
12-06-2008, 01:14 PM
صح لسآنكـ يابوعبدالله
حكم ودرر جوهريه
شكراً لكـ
الله يعطيك العافية ويصح بدنك، ولد شيوخ
ولا يحرمنا الله اشراقتك الرائعة فى صفحات ديواني
تشرفت بحضورك المميز
دمت بحفظ الله عزيزي
حسين