اهداء لــ: صلاح بن عجب بن نامي والشيخ رباح بن طعيميس

[حسين بن هندي]

بديت باللي عالمٍ كل ما خفيت= الواحد المعبود ملاك الارواح
من بعد ذكره باحسن القاف غنيت= من هاجسٍ غنى الطواريق وانساح
وساعة دعاني طيب الصيت لبيت = أجبت لاهل الطيب والبال مرتاح
أعتز بدعوة طيب العرف والصيت= وانا من اللي لابن الاكرام مداح
أبا امدح الطيب اليا اقبلت واقفيت= ومدح الوفي عندي كما الطيب فواح
اخذت من مّالاق وامعنت وامليت= ونصيت راس المجد ما جيت مسناح
واهديتهن للي على فعله أثنيت= نجمٍ تعلى في سما الطيب لي لاح
صلاح مهما قلت به مدح ماوفيت= راع الوفاء ردنه في الطيب مواح
وانا اشهد انك يابو يوسف تعليت= الطيب ترقا له على راس لولاح
من قمة العليا شربت وترويت = يابن الكرام مروية علط الارماح
حماية التالي هل المجد تثبيت = أهل المواقف للمواجيب نطاح
بعاد الهقاوي مبعدين المباييت= روسٍ رست لوهي عواصيف وارياح
وبسم ابو يوسف بالوفيين حييت= أقولها من جد ماني بمزاح
حييت يا رباح وبالكل هليت= ترحيبة تضفي على كل زحزاح
رباح لامن اللهب خالط الزيت= له ماقفٍ يلبس به التاج ووشاح
عز الضعيف اللي جداه التناهيت= ياقف معه حتى غثا الهم ينزاح
أبو عبد الله لمتعنت وتمليت= للشر مغلاقٍ وللخير مفتاح
مقدم هل العرفا رجالٍ زناتيت= اللي فعايلهم مكاسيب وارباح
نعم الرجال اللي لهم بالوفاء بيت= عرين مجد بعز مرفوع ما طاح
وصلاة ربي عد ما قلت وانهيت= على نبيٍ لامته خير نصاح