انا كل همي عفـو ربـي ومغفرتـه

[فالك البيرق]

سقا الله مكانٍ كلما ضاق طول البـال
تزيـد الهمـوم وضيقتـي لاتذكـرتـه
مكانٍ لعـل الله مـن رايـح الهمـال
يعله يالين تضيـق بالسيـل خاصرتـه
الياقبل من المنشا قنوفه تقـول جبـال
وهبت هبوب بمطلع الشمس واعثرتـه
وركد ماتقول الاموقف على الاطـلال
وبقايا رسومه غـر الامـزان خابرتـه
وصبت عليه الين ماكـل وادي سـال
وتحول بهـا خـد الموشـم وغيرتـه
وزبدها طفح والسيل من جالها للجـال
ومن ماعلى جتـك الشغايـا محدرتـه
مابين الهضاب النابيـه كنهـا سلسـال
بجيد الهنوف اللـي بترتيـب ناثرتـه
وبعد تم له من عقب سيل ثـلاث ليـال
ورويت ووافقهـا دفـا شفـت باذرتـه
وقامت تزيد وكل يوم لهـا فـي حـال
وصفا جوها عقب العواصيف كدرتـه
زماليقها لانسنس النـود معهـا مـال
وريح النفل فاحـت بجـوه وعطرتـه
بروض خلي ماجاه شـاوي ولاوبـال
ولامرتـه غيـر السحايـب وباشرتـه
ماغير ام سالم تزعج الصوت والموال
تقل ماخذه صوت ابو نوره وحنجرتـه
تغني طرب وانا من الضيق والغربـال
اسج القـدم مـع كـل فـجٍ تخيرتـه
بجاله حكرت من اشقر البن لي فنجـال
ومما يعدل خـاوي الـراس طهرتـه
بعيدٍ عن اصحاب المصالح وناس المال
ورفقة صغير كثـرت المـال كبرتـه
يجامل الياجيته ولاقفيـت فينـي قـال
والياجيت له بين الرجاجيـل صغرتـه
وقمت ابدع بيوت نوادر مـن الامثـال
ونسيت الهموم وكـل طيـب تذكرتـه
وتفاولت في باقي اليالي بطيب الفـال
وانا كل همي عفـو ربـي ومغفرتـه