بسم الذي نزل تبارك والانفال

[حسين بن هندي]

قصيده ترحيبيه بخادم الحرمين الشريفين الملك عبدالله بن عبد العزيز ال سعود عندما كان وليا للعهد بمناسبة زيارته لقطاعات الحرس الوطني بالمدينه المنوره

بسم الذي نزَّل تبارك والأنفال= اللي خلق خلقه على كيف ما يريد
يا مرحبا باهل المواقف والافعال= بعبد الله اللي شوفته كنها العيد
زيارتك ياسيدي تشرح البال= وتجدد البسمه والافراح تجديد
ونشتاق لك يا معرّب العم والخال= معدنك صافي ما يساوي لتَقْليد
النادر اللي ماكره راس ما طال= اللي يدسِّم صاحبه اليا بغا الصيد
كفه يدير الخصم يرجع على الجال= ويسقيه من سم الافاعي تراديد
ضرغام بالهجمات تضرب به امثال= يهوم هامات العدا بكل تأكيد
له بالوغى جوله ومخرج ومدخال= رئيس حرسْناهو عقيد الصناديد
الما يبرمون اعداه يكون حلاّل= لو كان صَعْبٍ ما يجي فيه تعقيد
سياسي مخضرم للصعيبات فتال= رأيه ينال من البشر كل تأيـيد
مثل القمر في الدجا يشعل اشعال= لو زاد ظلام الليل هو نوره إيزيد
ومثل الجبل لو جاته الريح ما نهال= رواسي للأرض من أجل لا تميد
بك الحرس يعتز في كل الأحوال= جميع ما بالمملكه دون تحديد
أنته فخرنا يا نسل شبل الأشبال= وحنا سلاحك جاهز وقْت ماتريد
دون الملك نحطّم الخصم لامال= ونرخص ادمانا للوطن دون تقييد
وسموكم لشعبكم درع واظلال= وفي كل عليا لك مقا م وتسنيد
أبو متعب منهجه زين الأعمال= الله يزيد ابّاقي العمر تمديد
اليا نصاه اللي به الهم ينزال= همه يزول وتكسب الكبد تبريد
من ساس ناسٍ تنثر الدم شلال= بارض الجزيره بان فعل الأواليد
حكامنا الفرّيس سلايل ابطال= أعلامنا اللي شيّدوا نجد تشْيـيد
عبد العزيز اللي حما نجد خيال= السيف يشهد له وحمر العَبَاريد
بالفعل معروفين من ماض الاجيال= عدوانهم ذاقوا مع الهم تنكيد
وعدوهم امكبّـليـنه بالأغـلال= ومَنْ حاد عن درب السلف جاهز القيد
وعن فوجنا شاركت في بعض الامثال= وعبّرت بالفرحات عبر الأناشيد
وارج الســموحة كـان مخطـي بـالأقوال= المعذره يا منقّد الشعر تنقيد
و أهـلاً هــلابـك في حلولـك وترحــال= ما تغرِّد الورقا على الغصن تغريد