مع أحلى الأماني للشيخ / سعود بن معيبد الديري بمناسبة زواج ابنه بندر

[حسين بن هندي]

بسم الإله اللي له الخلق سجاد=رباً له العبّاد ركّاع واسجود
اللي رفع سبع بلا سمك واعماد=وبامره يدير الفلك ويسيّر النود
بسمه بدينا والتماثيل تنقاد=والكل قول إيقال ميزان وابنود
لبيك يا داع ألوفا نسل الامجاد=لبيك يالديري بك الطيب مشهود
اليا دعا داعيك يا قرم الاولاد=يرقا بها الهاجس نبا شامخ الطود
بسم ابو بندر مرحبا دون تعداد=تحيةٍ تافي على كل موجود
يا مرحبا ترحيب بالجمع وافراد=ترحيبةٍ تنساق مع أزرق العود
سعود بيته دوم ملفا للأجواد=تلقى الوجيه الطيبه عنده اوفود
راعي هلا مع شبة النار معتاد=يحرق بها من غالي العود كمبود
والبن جاهز باحسن ادلال بغداد=به زعفران ايران صابغ ومز يود
وصيانيا تلقا بها وافر الزاد=بافطاح ضأن وطيّب الحشو مفرود
سعود جاد ويبلغ المجد من جاد=ويحقق المطلوب بدراك وجهود
يروم فعل الطيب والطيب له راد=والطيب من رامه بلغ كل مقصود
المدح لايق له بلاشعار ويشاد=والطيب ساسه بين عمان وجدود
من روس قومٍ لاحصل كيد واعناد=دفانة الركبه تفافيق بارود
تروي القنا والسيف من دم الأضداد=وتكسب حلال وخيل مع شمّخ القود
واليوم من فضل الولي أمننا ساد=الفوضى زالت بابها اليوم مأصود
بحكم آل سعود اللي لهم بالوفاء ماد=في ظل أبو متعب ذرا كل مظهود
وولي عهده نايبه درع واسناد=سلطان ابو خالد عما كل مقرود
درع الوطن للعز مصدر وميراد=على المواطن فضلهم غير محدود
لو أبا عدد فضلهم ما له اعداد=واحة حنان ظلها دوم ممدود
وليلة فرح بندر فرح هاجسي زاد=ومني لكم مبروك يا منقع الجود
عسى لياليكم بها أفراح واسعاد=ولأهل الفرح مبروك مع باقة اورود
تبقى لياليكم مسرات واعياد=أقولها من قلب والسان يا سعود
وصلاة ربي عد ما هل رعاد=على نبي وضح الدين بحدود