تشهد على طيب الوفي دمعة العين ** دمعة وفاء ما هي تماليح هلاس

[حسين بن هندي]

سر يا قلم مطواع بين البنانين= على الورق سجل تعابير واحساس
سجل سلامي مع كلامي الوافين= لمزعل حويلان بسطور قرطاس
راع الوفاء والطيب بالعسر واللين= اللي بفعله كاسبٍ كل نوماس
شباب يا مزعل وشبتوا على الزين= نفسك مدربها على العز والباس
الله يمدد في حياتك لنا سنين= وعسى الولي ياقاك من سوء الاتعاس
ياعز من جوله من البعد عانين= يا طيبٍ طيبه تأسس على ساس
عندي على طيبه اشهود وبراهين= يستاهل التمجيد من دون مقياس
تشهد على طيب الوفي دمعة العين= دمعة وفاء ماهي تماليح هلااس
عزيز عندي من رجالٍ عزيزين= ودّك مثل مزعل كثيرٍ مع الناس
راعي هلا مبداه طلق الحجاجين= اللي سما بالطيب في كل مرواس
في مجلسه تلقا الدلال وفناجين= فنجال بنن يبعد الهم واعماس
وللعود الأزرق بالمطايب دخاخين= كمبود اخيار العود ينعش للأنفاس
وصيانيٍ فيهن بنات البعارين= على مزاجه فصلن عند نحاس
أقرا الضيوف وزود الصاع صاعين= تلقا بديوانه هل الكيف جلاس
من لابةٍ كانه غدا الرأي رايين= بني شرار امجادهم ترفع الراس
زحول الرجال اليا غدا العلم علمين= عوق الخصيم ليعتلوا قب الافراس
يشهد لهم التاريخ أول وهالحين= على النقا ترمي راع الدرع والطاس
بحمي الوطيس أولاد مكلب جريين= بساحة وغى فيها المكاسب والإفلاس
كم ذود مصلاحٍ تقفوه عجلين= فوق المهار اللي تقضّع بالاضراس
وما قل دل ومعذره للفهيمين= كانه حصل بالقيل هفوه وملماس
وصلاة ربا بين الحق تبيين= على نبي سنته خير نبراس