حسين له مني تحية ومقدار

[حسين بن هندي]

حسين له مني تحيّة ومقدار= الله يجيره من جميع البلاوي
شيخٍ ولد شيخٍ محنَّك ومغوار= قرناس من ساسه وحرٍ نداوي
الاشقر اللي يلحق الجوال لاطار= من مخلبه شفت ابرق الريش هاوي
وسهيل نوره ساطعٍ فوق الانوار= ومن يهتدي بِسْهَيل ماهو بغاوي
اليا عدّوا الشجعان في كل مضمار= قلت العدد مبداه بسم اللحاوي
صليب رأي اليا تلاقوا بالاشوار= مخضرمٍ من بحر الافكار راوي
أبوه عاشق مكرم الضيف والجار= من لابة يثنون يوم العزاوي
أخلوا سروج الخيل يوم الملح ثار= وارماحهم مضرابها بالكلاوي
عدوهم يسقونه السم تكرار= وتشوف في كبده لهيب المكاوي
كتبت روس اقلام في مدح الاخيار= والكامل الله عن جميع المساوي
وأخذت أنا من قمّة الشعر نوار= وقطفت من عالي غصونه حلاوي