مع التحية للشيخ / سالم بن محمد بن نحيت بمناسبة زواج ابنه الملازم خالد سالم النحيت

[حسين بن هندي]

جينا نشارك بالفرح لابو نواف= وخالد نبارك له وتلك السميّه
أقول لكم مبروك ما هي تزياف= من قلب قايلها ومن صدق نيه
تهانيٍ أقولهن كم وارداف= لآل النحيت أهل الوفاء والحميه
تهانيٍ حلوه كما در مشعاف= اللي رعت زملوق بارضٍ خليه
وهاض الضمير وزان لي كتبة القاف= أداء للواجب وحق عليه
مشاركه لأحبابنا ذخر الأشراف= سالم وخالد والوجيه الرضيه
بأفراحهم صار الفرح شامل وضاف= على ضيوفٍ جوه والآهليه
ومبروك يا خالد ملايين واضعاف= وتنعم في الفرحه سنينٍ مديّه
يالحر لك ماكر على راس مشراف= ماكر حرار وعزوة السالميه
محمد وعبد الله وقدام وخلاف= ماكر حرارٍ ندّرن صيرميه
والهقوه إنك ما تجي دون الاسلاف= تسوّي ما سووه ميه ابميه
حفيد من جاله مواقيف تنشاف= محمد أفعاله بالمواقف جليه
سجل له التاريخ بالطيب ميقاف= كم نفس يعتقها بليا جزيه
وكم واحدٍ جاله والارياق نشاف= أطلق مساجينه وجوله هديه
اللي بعيد الدار واللي بالأكناف= مشا لهم بانصاف روحه وجيه
واليوم سالم شالها فوق الاكتاف= كفءً لّها واليوم قاد السريه
من طيب رأسه للمواجيب وقاف= في ماقفٍ يدعيه في كل هيه
شيخ طويل اذراع بعيد الاهداف= راع المكارم طيبٍ مع خويه
سالم إذا مس الحقب مابه اعجاف= وقت النوايب عالي المعنويه
بن نحيت اليا هبا كل بلاف= اليا ذكرنا ابوه قلنا حليه
هذا وابو نواف يشكر بالآلاف= يشكر لابو ناصر ويثْن التحيه
ويقول حضور حجاب زاد التشراف= ويشكر مشاركته ويشكر مجيه
وما قل دل ويفهم القول عراف= جمله مفيده للعقول الزكيه
الشعر فن وذوق وابداع واتحاف= مثل الذهب في عملة الصيرفيه
تمت بذكر منزّل آيات الأعراف= وصلاة رب البيت على نبيه