المنقـره حمـاد قـرم العيـالـي

[حسين بن هندي]

يامرحبا ترحيب غالي بغالي=بعد البطا لشاف والد لمولود
اعداد وبلٍ من صدوق الخيالي=واعداد مايخضر بعد سيله العود
ترحيب أحلى من حليب المتالي=عفر البكار اللي رعن بوّل الذود
ابكار ماعلق عليهن شمالي=بالقفر يرعن بالنبانيب وركود
بحماد بن راشد كريم السبالي=شيخ إلْبلي يذكر على الهون والكود
ويامرحبا ترحيبةٍ في مقالي=ترحيبةٍ تعم من كان موجود
أهلاً هلا تكرار في كل حالي=يامرحبا ياللي على الطيب محمود
المنقره حماد قرم العيالي=ريف النشاما كنهم عنده اوفود
ببيوتهم بناً وحيلٍ اجزالي=واهل الشجاعه لاغشى الجو بارود
في موقفٍ خطرٍ به الدم سالي=كم فارسٍ خلوه بالقاع ممدود
وسقم القلوب الحاقده بالفعالي=وقت مضى بالخيل طارد ومطرود
تنطح مقابيلٍ وتحمى توالي=عود القنا ترويه والسيف مجرود
يا ما خذوا غير الدبش راس مالي=فرّيس من فرّيس عمان واجدود
واليوم أمان وساد حكم العدالي=حكم آل سعود مطوعة كل مقرود
حي الله الاجواد كرام الرجالي=حي الله الوافين ماهبت النود
يمنى معزبكم بها الجود كالي=الشيخ بن سحلي ابو خالد سعود
قولت هلا مع فوح عطر الدلالي=الهيل والبن الحمر وزرق العود
الطيب ساسه من عمام وخوالي=لاشك ابو خالد نهج منهج العود
أذكار سحلي بالليالي الخوالي=ياما بذلت يمناه ماحسب الزود
وياما عطا من راس ماله اجمالي=وياما عطت يمناه من شمّخ القود
شي صحيح ولا يجيبه جدالي=فعلٍ مؤكّد والفعايل لها شهود
من لابةٍ لجا الرشا بالمحالي=أهل المليحا لا ضرب عود في عود
تشرب اعداهم من إيديهم نكالي=كاس الطنا يسقونها كل نمرود
والقيل يطلع فيه عالي ودالي=والمعذره من زلة دون مقصود
وصـلاة ربــي عـد مالفـي مـالـي=علـى نبـيٍ وضــح الديـن بـحدود