تهدى مع التحية للأخ الأستاذ : فالح بن عيسى السليمي

[حسين بن هندي]

ياقاف ساعدني بزين العباره=بالمفردات الكاملات الجزيله
لهل الوفا تهدى ولهل النداره=أبيات شعر واضحه في دليله
ابو طلال بقيمته واعتباره=في الصداره موقفه بالقبيله
الطيب فالح حايزه في جَداره=له ماقفٍ معروف من بين جيله
ثابت ولا تاره تَغَيَّر بتاره=لاصد غيره يحتمل للثقيله
من مرجعه نال الثقة والادارة=علم ورفق وحاز كَسْب النفيله
ما كل طير إيجوز وقت الصقاره=والحر الأشقر مايصيد الهزيله
فالح سلايل عود يعجب مساره=يستاهل البيضا بكل الوسيله
اللي لجاره مجتهد في وقاره=لأجل الجليدي نصف بيته يشيله
قرر وهد البيت كامل اجداره=خلى الدركتر من سطوحه يهيله
من شان جاره ما تغالا العماره=خلاه للمسجد دروبه سهيله
خلاه يمشي متجه للمناره=عبَّد له الشارع وساسه يزيله
وصاطي بدوره يوم لوذة اسعاره=نزَّل حِمل فنخان أجر وفضيلة
خلاه للرحيلي براس الزباره=يؤثر على نفسه وقنع بقليله
ومن يزرع المعروف يجني ثماره=والشري للي يزرعه حنظليله
عن سيرة الاجواد هاذي اشاره=والله عليم بدقها والجليله
وصلوا على اللي وسط طيبه مزاره=عليه صلوا عد وبل المخيله