خاطرة شعرية تهدى مع التحية للشيخ / غزاي بن حماد السليمي

[حسين بن هندي]

مرت بي الصدفه على الجابريّه=وليّه بها تذكار ماضي ومزمن
اسنين راحت ظرف صبح وعشيّه=ماينلحق مافات بيّام راحن
دنياً تقلّب بين شمسٍ وفيّه=هذاك تضحك له والذاك تطْحن
والناس كلٍ ضاربٍ صوب نيّه=وللي كتب مولاه رجليه يمشن
وأخذ بي الهاجوس نوبه قويّه=وخلاني انظم من قصيدي ودوّن
وابني من الأشعار ماطاب ليّه=ومتذوِّق الأشعار يحكم عليهن
إرشيف ذاكرتي ينكِّد عليّه=أيّام كالأَحلام يوم اتفطن
وفي موقفي ذكرت هذ وذيّه=واشوف رسم اطلال سامد وباين
وين البيار؟ اللي بقا بعض طيّه!=أُوّ وَين الذي شيَّد من الطين مَسْكن!
سامد جباها ماتجيها الضميَّه=ولا يمها حِم الذرا قيل ورْدَن
ما كنّها وردَتْ عليها الرعيّه=ولاحَزْوَرْ الْجَهَام فَوقَه وعطّن
ولا شرَّعَن بَالحَوض عند الر كيّه=ولانفّضَن لِلْحِيّهِن يَوم روين
ومقامها مرْكوز تزْعَب ادليّه=يَسْنا جمَلْهن لين روين وقادن
هي مدهل البدوان ديره مريّه=وان حان وقت القيض تِنْزَلْ وتقْطَن
وهي صندل المعروف بالجاهليّه=اللي بها جَسَّاس لكليب يطعن
وعلى حَجَرْها كاتبٍ لّه وصيّه=بدمه ثلاث اسطور ماعاد يمحن
وشامت لابن حماد ساعة مجيّه=نعمَين ابو ساجر ولا فيه يكفن
راعي هلا هي عادته بالتحيّه=في مجلسٍ تلقا به الطيب والبن
مبرّك المفرود وسط الصنيَّه=صيَانْيٍ لولا الحلق ما يشالن
غزاي ساس الطيب ميّه بميّه=اجنيه ابو سيفين مَا يقاس بَالْيَنْ
واطلب له التوفيق من صدْق نيّه=واقول لَلأمَام من زَيْنْ بَزْيَنْ
هذا جوابي واسمحُوا بالخطيّه=الكامل اللي خالق الإنس والجن
وصلاة ربي عد ما نفسْ حيّه=على نبيٍ سر بالدين واعلَن