مع التحية للشيخ/ تركي بن بجاد بن نحيت بمناسبة حفل تخرج ابنه بجاد برتبة ملازم

[حسين بن هندي]

مبداي بسم الله جلّ جلاله=الأول الآخر عزيز الجلالي
مرْجِع على يعقوب غالي عياله=بعد البطا هو والنظر جاه تالي
وسلام للي حاضر وحي فاله=بسم المعزّب حَي فال الرجالي
واجب على المدعو لمن هو دعاله=إجابته تشريف حقاً يقالي
واجَبْت للوافين في كل حاله=تشريف للداعين بالاحتفالي
ومشارك الأشعار هذا مجاله=وانا بدوري فيه هذا مجالي
وردت بحره وارتوي من ازلاله=نوادر الاشعار ماهن احثالي
وهاض الضمير وفاض من مّا بداله=وكتبت واسترسلت باللي طرالي
من شان رجلٍ بالوفاء ينعناله=ومن شيمة الغالي نشد الرحالي
لابن نحيت انشاركه بحتفاله=يوم احتفى ببجاد ذرب العيالي
وبجاد له مبروك نقولهاله=رتبة ملازم فوق متنه تلالي
نقول له مبروك يسعد لياله=يعيش بالتوفيق مع طيب فالي
بجهود شيخٍ حقّق الله أمَاله=نال الطلب واليوم زاد اكتمالي
بن نحيت اللي يحوش الجماله=شهم ونعدّه بالمكارم مثالي
ابو عقاب اللي حميده خصاله=تركي ولد بجاد عَرْب الخوالي
اللي دفع بالطيب جهده وماله=وبالجد والمجهود نال المعالي
يروم للعلياء بغالي حلاله=ما هو من اللي يدّخِر للرّيالي
كم صعب حملٍ قام به وارتكاله=مثل البليهي يحتمل للثقالي
الْمَعَالي الأخلاق تَارد حباله=يروم فعل الطيب طَلْق السبالي
الطيب لو هو بالثريا يناله=ولا هو على مثله بعيد المنالي
الطيب صعب ولا يجي بالسهاله=ولا هو على اللي يفعلونه محالي
الطيب فعله من سمات الرجاله=الطيب باقي لو راع الفعل بالي
واشيد بَفْعَال الشرف والأصاله=مَنْسَى فعايل مبعدين المدالي
نحايته لاصار خَطْبه إجلاله=فتخان الايدي للثقايل إجمالي
قياد للـهيجـاء رجال البساله=مقْدم بني سالم رجال الكمالي
في قارة الأسلاف قادوا نضاله=معطّرين الشلف هي والسلالي
واليوم ساد الكل حكم العداله=حكم آل سعود اللي علينا إظلالي
حكم العداله ما ندوّر بداله=والكيف طاب ومشرب النفس حالي
تمت وصلى العبد باخر مقاله=على نبي منهجه بالعدالي
نبينا المعصوم راع الرساله=اللي صدع بالحق به ما يبالي