الشيخ عيسى من رجال مناعير

[حسين بن هندي]

باسم بن ناقي مرحبا بالمسافير= ترحيب وافي بالرجال الوفيه
عيسى يكرر مرحبا بالمسايير= وكل الحضور يعمها بالتحيه
ترحيبٍ أحلى من حليب المصاغير= اللي رعن زملوق بارض ثرويه
والذ من شهدٍ مصفى بتكرير= أحسن شراب جاهزٍ من خليه
ترحيب فيه المسك والعود تعطير= والهيل والعمبر يقدم هديه
حييت يا تركي معزه وتقدير= وسلامه سعيدان حيوا مجيه
وقاعد ومن معهم طوال الاشابير= حي الله الجميع من صدق نيه
تركي ولد من له بالامجاد تسطير= عمر زكا بالطيب في كل هيه
عقب شبات الحرب سيوفٍ بواتير= تركي واخوانه سلة النافعيه
الشيخ تركي في جميع المعايير= يمناه في كسب المعالي رهيه
تركي صليب الرأي حلمٍ وتفكير= تركي ابن ربيعان زبن الونيه
وللطايله الوهاب يزمي كما النير= مواقفه بالمجد ماهي خفيه
عتيبه الهيلا بعاد المشاوير= أمجادهم عن التعرف غنيه
وسلامه اللي من وفاه أدلج السير= يم الاحبه واهل الشاذليه
مقر للأمجاد ورد ومصادير= دايم على العلياء عزومه قويه
من روس قومٍ بالمواقف مشاهير= أصل العرب قحطان معدن نقيه
وكلٍ بحقه وافيٍ ياهل الخير= وذكر الاسامي به صعوبه عليه
يومٍ جمعكم عمر الود تعمير= يرفع مقام الود باعلى البنيه
عند ابن ناقي زدتوا الحفل تنوير= بحضوركم فرحان نفسه رضيه
وهبه من المعبود يفرح اليا زير= ساسه مقر الطيب والغايريه
ابو عبدالله ما يعد المخاسير= يمناه تندى بالكرم حاتميه
الشيخ عيسى من رجالٍ مناعير= من روس حرب وعزوته سالميه
الناقي اللي من سلايل مساطير= زحول الرجال اللي تحل القضيه
وحرب الكبيره فوق مدح الشواعير= يستاهلون المدح رجال الحميه
مما يحوز بخاطري قلت تعبير= كتبت من الاشعار ما لاق ليه
والمعذره إن كان بالقول تقصير= كنه حصل من غير قصدي خطيه
وصلاة ربي عد وبل الشخاتير= على رسول الحق خير البريه