قصيدة في مدح :الشيخ صياح بن سعد بن غنيم

[حسين بن هندي]

بديت باسم اللي رفيع مقامه= منزل هماليل المطر من غمامي
واجرى لسيله بالوطا والعدامه= واخضر نباته وارتوى كل ضامي
ومن واجب الشاعر يعمم سلامه= للشيخ واللي حاضرين السلامي
صياح يهدى له جزيل احترامه= اللي على العلياء يشد الحزامي
قمة سنام المجد راقي سنامه= في قمة العلياء بناله اخيامي
راع الوفاء يذكر وتأتي علامه= يذيع صيته بين شرقٍ وشامي
بدرٍ سطع نوره بعَتمة ظلامه= يجلا الظلام انوار بدر التمامي
صبحٍ إليا ما بان قامت نيامه= مثله ترى ابن اغنيم يجلا الظلامي
مجده قديم من الخوال وعمامه= الساس طيّب والعمل دوم سامي
ابوه تاج المجد علق وسامه= وارسى السفينه حولها الموج زامي
أخذ بفعل الطيب شده وقامه= بالجد والمجهود نال المرامي
واطلق مساجينٍ بساعة قيامه= وريَّح اعيونٍ ساهره ما تنامي
يفتح أبوابٍ مغلقه في إبهامه= لله در الفعل وهاك البهامي
ساس المروّه والوفاء والشهامه= فعله مشرف بالليال القدامي
مقدم جهينه عز هاك القدامه= عوق الخصيم إن حان وقت الخصامي
تشرب اعداهم كأس علقم ندامه= وابيوت اعداهم من يديهم هدامي
وصياح عنه اليوم شيال زامه= وقول الحقيقه نور يجلى العتامي
نداويٍ للصيد ما به غشامه= صيده سمين ولا يصيد الهلامي
الخرب لا كوبر يكسر إعظامه= أشقر بعيد الطلع والكف دامي
منصاي حر مجذبه من تهامه= منصي وناصيكم وجيتك قوامي
واللي نصا صياح حقق مرامه= هداج ورده ما تصدر ضوامي
وصلاة ربي واجبه في ختامه= علـى شـفيع الخلق يوم الزحامي