مايجتمع بالرجل عز ورخامة

[الخيال]

ماتت حمامة ويش تعني حمامـة=شارون طاح وهيبته في فلسطين
يابنت راس المال عندي كرامـة=وانتي على راس الكرامة تدوسين
وأنا ولد من يحتمـون الجهامـة=حنا هل الرّدات عشنـا عزيزيـن
يوم الملاقى بين هامـة وهامـة=ناخذ ذفايف من بغونـا مثاريـن
ويومٍ عج الخيل زايـد عسامـة=عدونا يبشر بشلفا علـى العيـن
الخيل سرد وشهب هذي علامـة=لأهل الوغى ومرجحين الموازين
افعولنا تـزداد طيـب وشهامـة=يشهد لنا التاريخ ضمن الدواوين
مايجتمع في الرجل عز ورخامـة=تبقى المعـزة غايـةٍ للكريميـن
ودي اعيش العمر ماأكسب ملامة=وأكبر مذلة طرد نـاسٍ مقفيـن
دفعت لك حالي ومالـي غرامـة=وقلبٍ يضخ الحب عبر الشرايين
صافي جبينك مثل برق الغمامـة=اللي استهلت بالبرد والوداديـن
واللي ذبحني تحت مبسمك شامة=ياجعل تفداها البنـات المزاييـن
معطيك ربي من حلاتك زعامـة=تاجٍ على راسك وعينك براهيـن
لاشك صابك من غرامي غشامـة=وشوّش بك التفكير وقمتي تحدين
تذكري آخر لقـا فـي الثمامـة=على الشرف كنا ونبقى شريفيـن
تذوّقي وشلـون طعـم الندامـة=يمكن ليا ذقتي طعمهـا تحبيـن
ماعاد أحبك لو تقـوم القيامـة=ومهما تعذرتي تـراك بتروحيـن
روحي ولالك في المحبة سلامـة=(الله ولا حـبٍ يـذل المحبيـن)

هذه القصيده اعجبتني ولا اعرف اسم شاعرها