ديوان حسين بن عبيد الله ( مساجلات )

[حسين بن هندي]

أبيات للشاعر/ حمود بن سالم السليمي موجهات للشاعر: حسين عبيد الله



سلام للي تكسب الطيب يمناه=اللي تعلى عاليات الرجومي
هذاك ابن هندي عسى اللاش يفداه=رجل يسد الواجبه واللزومي
الشعر فاهم به وعارف لمعناه= يسبح بحور الشعر وفيها يعومي
شعره جزيلٍ دايمٍ فوق مبناه=مثل الجدي معروف وسط النجومي
ويا حسين انا جيتك بموضوع واقراه= وعطني جوابك يا قوي العزومي
كثر الحسد والوقت شانت مزاياه=ناسٍ تحسدك لو بلبس الهدومي
تكره علوم الخير والشر تبغاه= معهم على النمات رخصه عمومي
واليا طلع شاعر وعدى بمرقاه= كثرت علوم مدورين العلومي
وانته فهيم تفهم اللي قصدناه =يا شاعرٍ شعره تعدى الغيومي

رد الشاعر: حسين بن عبيد الله على أبيات حمود السالم

يا مرحبا باللي بيوته منقاه= شاعر لجزلات القوافي يشومي
حمود سالم عايزاتٍ سجاياه= عندي هلالي من رجالٍ قرومي
اللي شكالي بعض ناسٍ مهباه= دلوح ناس مضيعين السلومي
أهل الحسد واهل النوايا المخباه= اللي على الشينات تقدم قدومي
يا كثرهم في وقتنا اليوم كثراه= شطار هرج قصيرين الكمومي
وسهيل عالي ماحدٍ لاحق أقصاه= باعلى مداره مالثّرت به سمومي
وترى الثقه بالنفس والطيب تلقاه= والله بعون اللي لغيظه كظومي
وادر الرفيق ولا تزعّلْك عوجاه=خص اليا جاتك من ادنى اللحومي
إلا الوجه مابه مجامل ولا جاه=موتٍ بعز ولا حياةٍ تدومي
ولولا الخطأ ما جت محاكم ولا قضاه= والحق ما يرضي جميع الخصومي