ديوان الشاعر نايف سعود

[صافي نوايا]

بسم الله الرحمن الرحيم

كما وعدناكم بطرح دواوين شعرائنا هاهي باكورة الدواوين ترى النور ونبدئها بديوان للشاعر نايف سعود الضويحي وسوف اقوم بطرح قصائد الشاعر وبمساعدة الاخ القريناوي نيابة عن الشاعر وذلك لعدم تفرغ الشاعر بالوقت الحالي

نبذه عن الشاعر

نايف بن سعود بن ضويحي بن نقاء السليمي الحربي من مواليد القرين عام الف وثلاثمائه وتسعين للهجره نشاء

في بلدة القرين واكمل تعليمه الابتدائي والمتوسط في نفس البلده ثم التحق بقطاع الحرس الوطني عام الف

واربعمائه وعشره بداء في مجال الشعر في سن مبكره وبداءت علامات النضوج الشعري تتسم في قصائده

تدريجيا فاصبحت قصائده مطلبا لكل متذوقي فن الشعر الجميل وقد قال في احد قصائده معرفا بنفسه


انا سليمي والسليمي عريب جدود=من اهل المليحا محتمين الحميه
الاسم نايف وابوي سعود= الجد جابر والخوال العطيه
الف وثلاثميه وتسعين مولود=متزوج ولي عيال الحاله الاجتماعيه

والان نترككم مع قصائد الشاعر مع العلم ان الردود سوف تكون في موضوع مستقل

[صافي نوايا]

لاتحسبني يافـهد خــالي البــــــــال=أضـحك وأنا قلـبي كـثيرة لهـودة
قلبي جريح وخــايف هرج الأنـذال=ماودي الأنـذال تكـــشف سـدودة
ماهمني دنيا ولا هـــمني مــــــــال=والله مـاهم المـال نقصـه وزوده
ولا همــني من حـط للنـهد شيــــال=وإليا عرض كن الجواهر خدوده
اسباب ما فـكرت به وأشـغل البــال=وأخذت مع مسعاه روحه وعوده
شي يخلي كـامل العــقـل يهتــــــال=ويمكن جميع الفكر يعدم وجوده
وشلون نرجي غيث والحسد مازال=بين القرابه شفت ناس حســـــوده
ناس مساعيهم على شـين الأعمــال=درب الرداء والهون دايم تـروده
يالله عسى دار أهل القيل والقـــــال=من فوقها ماعاد ترزم رعـــــوده
تاخذ ثمان سنين السيل ماســـــــال=لين الورق والرمث ينحت عـوده
ليا أقبل عليها صادق المزن ينجال=يامدير ملك الفلك يسره وكــــوده
ويمر على دار للأجواد منــــــــزال=دار ودود وكــــل نـــــفس ودوده
اللي مجالسهم حديث وتهــــــلال=ومن جالس أهل الدين يطلع بفوده
أهل علوم الطيب في كل الأحوال=ترا صـفات الرجل يمسك حــدوده

[صافي نوايا]

لاوالله إلا قربت جيت الساعــة=والوقت درهم والمواري دليله
جت المواري كلها باندفاعـه= والوقت الأول حل وقت بديله
خف الثقيل ولا بقيله طماعه= صفى حسابة وإستعد لرحيله
راحوا رواسي ميلته وإنهزاعه=اقفت بهم مابين يوم وليله
غابتبهم شمس النكد والشناعة=عسالهم بالخلد بيوت ظليلة
ضاقت فجوج البر وحشرة سباعة= والجو حامي والموارد قليله
سلم العرب تسببوا في ضياعه= لباسة القبوع فوق الفنيلة

[القريناوي]

لبى الملبي بالمشاعر ولبيت=فزن هجوسي وأنتبن للمنابي
واخذت من زين المعاني وخليت=وطلبت ربي للقدا والصوابي
الفضل للي مالغيره ترجيت=الجم راهي والقناعة زهابي
بالعز وبيوت المعزة تربيت=ورثٍ ورثته ! ! ماصك بابي
ياكثر ماكنيت وياقل مابديت=ساعة زمن ! ! زادت عناي وصوابي
"وجدان" و "الدرة" وترسانة البيت=منها يشيب الراس قبل المشابي
وفي ملتقى النهرين عبرة وتثبيت=تلحِق ملام وتستبيح العتابي
بالعز سيري ياوطن طيب الصيت=رفرف علم عزك بروس الهضابي
يا أعز وأغلى دار يا أم المواقيت=دار الحرم..دار النبي والصحابي
الحكم للي ماحكمها تصاويت=حاكم حكمها بالحدب والجنابي
ما أخطى هدف مغزاه لو أخطن الهيت=كم ليلة قالت معزي سرابي
صقر جمع شمل العرب عقب تشتيت=وعقب التباعد صار فيه أقترابي
شوق الهنوف اللي زهت ذايع الصيت=اللي خذاها غصب والكيف طابي
سرا لحقه والخلايق مباييت=يشعى الركاب ومحترم بالكتابي
قال الشكر ودعتك الله ياكويت=النفس ملت من طويل إغترابي
الوالي الله مير أنا أموت ماوليت=والويل للي ماحسب لي حسابي
أما شهيد العز وإلا توليت=وقلبي ليا صك النشب مايهابي
عقب حماة الدار حماية البيت=رجال المواقف ليا هبا كل هابي
للسلم سلم وللمعادي دنميت=والحبل له مهلةٍ وأنكرابي
بالبسملة تحشر جمــيع الطواغيت= إليا انكشف مابالخبا والمخابي
لبيه ياداع الوطن يوم ناديت=بارواحنا نفديك يا أطهر ترابي
والحكم للي ماحكمها تصاويت=حاكم حكمها بالحدب والجنابي

[القريناوي]

قالوا تجمل قلت وقت الجمايل=اقفا وقفا بالجمايل واهلها
ماعاد به تال الليالي حصايل=كم واحد سوى الجماله واكلها
يبي الجميل وذاق مر النكايل=واصبح عليلٍ علته ماحتملها
لا شيف معروفه ولاله فضايل=والطيبه ياخذ مصيبه بدلها
وأسباب ماسبب نزوح الجلايل=ناس نست تال الليالي خجلها
نسيت عوايدها وسلم القبايل=قبلت عوايد ناس ما الله قبلها
حياتها على العيا والمحايل=حب المصالح التمصلح قتلها

[القريناوي]

كبرت في عينك عقب صغري العام=والحمد للي كبر الزول بالعين
الظلم مسر اليهودي وصدام =والكثر ماحرر قضية فلسطين
وسبحان من بأمره تدابير الأيام= قامت تصفقنا على العسر واللين
نصيفة العالم رومايتز وعظام=ول يازمان العولمة علك البين
اللي تركته من غرابيل وألآم=ألحقته الأسهم وراحوا مجانين
نبي الجنوب ونتجه يمة الشام=ونقول هذا الدرب ونصير غادين
مير الحظيظ اللي على دين الأسلام=والا ترا غيره يعود ولاشين

[القريناوي]

قال الذي قول الحقيقه يقوله=قول الحقيقه حق والحق ينقال
الحق نور وكل باطل يزوله=اليا ظهر يظهرعمل كل بطال
وقول الرجل اليا صدق من كموله=واليا اختلف تخالفت فيه الأقوال
وغير الصحيح ما صح لو صححوا له=الصدق يبقى والتلافيق تنزال
قول بلا معنى قليل محصوله=ضحضاح مايروي عطاشى اليا اجتال
ومن لا يميز مخرجه من دخوله=ما كل باب له مخرج ومدخال
ومن لا حسب للناس ما حسبوله=ولكل لحيه قالوا الناس منزال
الرجل ما يجهل إدروب الرجوله=مايجهل دروب الرجاجيل رجال

[القريناوي]

دار الزمن في صف سبر المدينه=واستنكرت سبر الشواوي مداره
وشمس الزمل زمت شروقه أبحينه=والليل مزمل من زملها نهاره
واستزهفت جابت وجيه الضغينه=واضغن يمينه واستدارت يساره
لو الحقايق كلها في يمينه=مضمونها ماينظمن في قراره
تكنها هيبت اسنين الوتينه=تنحى على غبت جلاد ونعاره
إرزامها يرهق إرهاف سنينه=وتجتاح نطاح الحصين بجداره
جنبا يجانبها جنوبٍ متينه=وافروعها فرعي وليع الشراره
كبرت عن الوليه وولت حزينه=وادراكها مدرك يقين الخسارة
واليوم الأسود ضدها محتسينه=لو الزمن مزمل عمارة دماره
وشمس الزمل زمت شروقه بحينه=والليل مزمل من زملها نهاره

[القريناوي]

يامعترض للناس أعرض عن الناس=أعرض عن أعراض البشر وأجتنبها
مابأعتراض الناس خير ونوماس=من يعترض للناس يلقى نشبها
الهرج للفتنة والأنشاب مقباس=من شب نار الشر يصبح حطبها
يصبح ضحية للمشاكل والأتعاس=محبط أعماله والرجولة عقبها
الله عطى الرجل فكر وأحساس=يعرف أسلوم الناس ويعرف أدبها
من لايفكر قبل الأقدام ينحاس=يبي رسنها ويتخطف ذنبها
الطيب ماحاشه من الناس هلاس=يصعب على اللي حسبته ماحسبها
ماللردي في مجلس الطيب مجلاس=الجرب تعدي بالجرب من قربها
تم الجواب اللي بنيته على ساس=من هاجس صاغ البيوت وكتبها
وصلاة ربي عد ماهب نسناس=علىشفيع الخلق ساعة رهبها

[القريناوي]

تصارخن بنات المعاني والافكار=صرخة ندم يولد بها الطفل ويشيب
فجعن وفجن النحر سر و أجهار=على فقيدة حرب حام المواجيب
حل القدر وازتم قصاف الاعمار=حاد الحداما بالحدب والمشاعيب
يالله دخيلك من صواديف الاقدار=صحيح ماتصفي لبقعاء مشاريب
هواش راح وبدل الدار بالدار=على متون الغيظ ودي ولاجيب
تبكي على هواش صلبات الاشعار=وعليه يبكن االنجوم المراقيب
عساه مايعرض على واهج النار= يامن بامرك تطلع الشمس وتغيب
بحماك ياعالم خفيات الاسرار=ياحي ياقيوم ياعالم الغيب
والموت حق ولاعن الموت معبار=وأمر الولي لا صار ماعنه تجنيب
ولا مات من عقب مشاكيل واحرار=تبقى عيال الذيب في هيبة الذيب
العز يبقى له مناصير وانصار=والعصر شاهد والليالي تجاريب

[القريناوي]

أحدن نحبه حب لله بالله=وأحدن نحبه حب من شآن حاجه
وأحدن نحبه حب من طيب معناه=ودايم ترى الطيب مزاجي مزاجه
أشفق على راعي الوفاء لاعدمناه=والحر الأشقر مايخواي دجاجه
الرجل مايجهل طريقه وممشاه=والذيب لامنه عطى الدو باجه
دايم على روؤس المراقيب مرقاه=ويصبر ولو حده زمانه وساجه
ومن حدته سمر الليالي على أقصاه=منين ماوجه يواجه احراجه
وكم من عليل ناقل داه برداه=رغم الاطباء مالقوله علاجه
والمبتلى يصبر عى عظم بلواه=ولابد من بعد المضيق أنفراجه

[صافي نوايا]

قالت وش أحب لاتحب قلت ثنتين=وكل على ماود قلبه ميوله
الأوله سحر الغلا والمحبين= شوق يشوق العين زوله وطوله
فيها هنا قلبي ومنها عنى العين=حبه ملكني ملك حاكم لدوله
سبحان من صور جماله من الطين=وأعطاه من زين الحلايا كموله
هو غايتي ومناي أول وهالحين=من شوفته مافارق العين زوله
والثانية ان كان عنها تسآلين= فرق الرجال المدعين الرجوله

[القريناوي]

ياالله ياللي فارض حجة البيت=ياواحد نرجي منك الشفاعه
طول عمر اللي لو رحت بالعالم وجيت=ماني الاقي أطباع تشبه أطباعه
أمي اللي لها وسط الحشا بيت=بيت تأسس من حلاوة رضاعه
والله لو أمشي حاف الأقدام حجيت=لو أرحل من نجد لديارالمجاعة
مايعادل جزء من فعلها كل شيء سويت=ولا يرجح الميزان بخفيف البضاعه
وأنا بأيام الجهل على أمي أخطيت=وأظن اللي أنا أسويه فيها شجاعه
واليوم عرفت كل شيء بتثبيت=لكن وقت راح صعب إرجاعه
يالله يامحي الحي والميت= ياوالي الاقدار معطي القناعه
يافارض الأحرام في المواقيت=يامرسل الهادي وأمر أتباعه
تطول بعمرها لنا نور بالبيت=تجعلها من اللي لهم عندك شفاعه
وصلاة ربي عد ما بالأقلام خطيت=وأعداد مابان النور وبين شعاعه

[صافي نوايا]

الليل خلف الشمس شفته عقب ليل=شفته يداعب للهواء العذب يامنيف
عن الشروق لفوق يفهق عن الميل= بروس الانامل لاسود الليل تصريف
في كوكب خلد على عرش تجميل= فيه الشفق والسيف فوق الشفق شيف
تحت ميول ظلال خرس مظاليل=خلقن على عسف الخليقه معاسيف
شمس الجمال اللي تعلت على الجيل =اليا شرقت كل الكواكب مكاسيف
تغار منها البيض كيف الرياجيل= تذهل بها الاذهان دون التواصيف
اشوفها لكن مالي محاييل= من دونها حشمت هل الستر والكيف
والحب لو دربه نكال وغرابيل= تمشي به العشاق ولامن تكاليف
ولا اقدر اصور زينها بالتماثيل= سبحان من صور حسين التواصيف
غنى لها قلبي لحون ومواويل= وحبه رقابي بالطوال المشاريف
أرقى بحبه روؤس الآفاق واميل=عليه وجدان الضماير ملاهيف
الله ياذكر الغلا والتعاليل= يسقي ليالك ياليال الشفاشيف